Հունիսի 1-ին, Մոսկվայում, Իրինա Վիներ-Ուսմանովայի մարմնամարզության պալատում, տեղի է  ունեցել  պատանի օլիմպիականների միջազգային հավաք: Մասնակցել են  14-18 տարեկան ավելի քան 200 մարզիկներ: Նրանց թվում  է եղել նաև ՀԱՕԿ –ի պատվիրակությունը, որի ղեկավարն էր անցյալի նշանավոր ջրացատկորդուհի Մարիետա Հակոբյանը: Նա զրույցի ժամանակ  ասաց, որ ՌԴ մայրաքաղաք է ուղեկցել Երևանի և Գյումրիի չորս մարզիկ.  հունահռոմեական ոճի ըմբիշ Խաչատուր Սիմոնյան, լողորդուհի  Միլենա Դավթյան, ֆուտբոլիստուհի  Յանա Հարությունյան և ձյուդոիստ Արտուշ Աթանեսյան:

Մասնակցել են նախկին ԽՍՀՄ – ի ութ հանրապետությունների պատվիրակներ:

Համավարակի սահմանափակումների պատճառով եվրոպական մի շարք  երկրների երիտասարդ մարզիկներ չեն կարողացել մեկնել Ռուսաստանի մայրաքաղաք: Նրանք մասնակցել են  առցանց տարբերակով:

Ֆորումի մասնակիցներին ողջունել է ՌԴ  ազգային օլիմպիական կոմիտեի նախագահ, ԽՍՀՄ, Եվրոպայի, աշխարհի և  օլիմպիական խաղերի բազմակի ոսկե դափնեկիր   Ստանիսլավ Պոզդնյակովը: 

Նա ասել է, որ միջոցառումը միջազգային եզակի հարթակ է ներկաների համար, որոնցից շատերը կդառնան  <<  Փարիզ – 2024 >> , << Միլան - Կորտինա դ'Ամպեցո – 2026 >> , << Լոս Անջելես – 2028 >> օլիմպիական  խաղերի մասնակիցներ: Բանախոսը հույս է հայտնել , որ  մոսկովյան ֆորումի շնորհիվ ապագա օլիմպիականները կհարստացնեն իրենց գիտելիքները, կհաստատեն նոր ծանոթություններ, ընկերական կապեր:  

ՄՕԿ-ի ղեկավար Թոմաս Բախը և Եվրոպայի օլիմպիական կոմիտեի  / ԵՕԿ /  նախագահի ժամանակավոր պաշտոնակատար Նիլս Նիգաարդը տեսահոլովակի միջոցով են ողջունել հյուրերին:

Դասախոսություններով հանդես են եկել հեղինակավոր մարզիչներ և մասնագետներ:

Երիտասարդ օլիմպիականները մասնակցել են   կրթական, սպորտային և ինտերակտիվ ծրագրերի, հնարավորություն են ունեցել  ստուգել իրենց ֆունկցիոնալ պատրաստականությունը, ծանոթանալ մարզումների նոր մեթոդներին, անօդաչու թռչող սարքերի կառավարման հիմունքներին և այլն:

Կազմակերպիչները մասնակիցներին հանձնել են  հավաստագրեր և հուշանվերներ, նաև էքսկուրսիա է անցկացվել  Մոսկվա գետի երկայնքով և այլն: