Այսօր հանդիպում տեղի ունեցավ Հայաստանի ազգային օլիմպիական կոմիտեում:  Անմիջապես ճանաչեցինք անցյալի  անվանի  ճկասուսերակիր Գագիկ Հովհաննիսյանին : Նա և մյուս մրցաձևերի պատասխանատուները   հրավիրվել էին խորհրդակցության: Այն կազմակերպել էր   մարզաձևի ՀՀ  ֆեդերացիայի նախագահ,  անցյալի բարձրակարգ թրասուսերակիր,  գիտությունների դոկտոր  Արմեն  Գրիգորյանը:

Գագիկ Հովհաննիսյանը հաշվետվություն ներկայացրեց  Մադրիդում անցկացված միջազգային օլիմպիական վարկանիշային մրցաշարից:  Ժողովականները մասնավորապես  ափսոսանք հայտնեցին   Էմմա Պողոսովայի համար:

Մեր խոցասուսերակրուհին խմբային  մրցաշարում  երեք հաղթանակ տանելուց հետո  մտավ  1 / 16 –րդ փուլ, որտեղից  սկսում է գործել օլիմպիական մրցակարգը:  

Բյուրեղավանցի  մարզուհին հաղթեց ավստրուհու  արգելքը ու իր համար տեղ ապահովեց առաջին ությակում: Բելառուս մարզուհու հետ պայքարը դրամատիկական բնույթ կրեց:  Միավորների մեծ տարբերությամբ հաշիվը գլխավորում էր մրցակցուհին՝ 14 : 10: Էմման սթափվեց, կենտրոնացավ, անընդմեջ չորս  նպատակային խոցում կատարեց ու հավասարեցրեց հաշիվը: Թվում էր խուճապի մատնված բելառուսցու  նկատմամբ վերջին ՝ վճռական խոցումը նույնպես կկատարի Երևանի քաղաքապետարանի սուսերամարտի ՄԴ –ի սանուհին : Բայց հակառակը ստացվեց և մեր պատվիրակը ցավալի պարտություն կրեց:

Էմման հուզվեց, արտասվեց . . .  Նրան հասկանալը դժվար չէր:

Խոսվեց մեր երկրորդ մասնակից, ճկասուսերակիր Մայքլ Հովհաննիսյանի մասին: Նա մեզանում թեստավորվել և մրցավայր է մեկնել լիովին առողջ վիճակով: Տեղում ստուգման արդյունքը դրական է ցույց տվել , որի հետևանքով Մայքլը   Մադրիդում  է ՝ մեկուսացված:

ՀՀ ֆեդերացիան մշտական կապի մեջ է  իսպանացի գործընկերների և բուժանձնակազմի հետ: Ի դեպ, մադրիդյան թեստերի հետևանքով տարբեր երկրների մարզիկներ նույնպես տուժել են: