ԾԱՂԿԱՁՈՐՅԱՆ ՀԱՄԱՏԵՂ ՀԱՎԱՔՈՒՄ

12:41 - 15 Հուն, 2021

Ծաղկաձորը այցելուներին ձգում է տարվա բոլոր եղանակներին: Ձյան ճերմակ սավանը,  օլիմպիական գլխավորի մարզահամալիրի մարզումային և սոցիալական պայմանները,  աշխատակիցների և, մանավանդ, Հայաստանի բռնցքամարտի հավաքականի անդամների ջերմ, բարեկամական վերաբերմունքը հիացրել են կաշվե ձեռնոցի Խարկով քաղաքի վարպետներին: Այս մասին ամենօրյա զրույցներում խոստովանում է հյուրերի ավագ մարզիչ, Ուկրաինայի վաստակավոր մարզիչ Վիկտոր Դեմչենկոն:   Ի դեպ, նրա սաներից  չորսը հանդիսանում են Ուկրաինայի ազգային հավաքականի անդամներ: Այս ամենը հեռախոսազրույցում ասաց Խորհրդային Միության վաստակավոր մարզիչ, Հայաստանի օլիմպիական հավաքականի գլխավոր մարզիչ Ռաֆայել Մեհրաբյանը:  Տեղեկացանք , որ թիմերը օրեկան երկու համատեղ մարզում են անցկացնում: Մի դեպքում  տղաների ընդհանուր ֆիզպատրաստականության որակների բարելավումն է, մյուսում  շեշտը դրվում է տեխնիկայի և  տակտիկայի   առաջընթացին:

Համատեղ պարապմունքները  ևս մեկ  առավելություն ունեն: Մարզաձևի երկու տարբեր դպրոցների ներկայացուցիչների  ընկերական մենամարտերը  որոշ չափով հարստացնում են  մրցափորձը:

Հունվարի 20 –ին Հայաստանի թիմը կվերադառնա  Երևան և հավաքը կշարունակի Օլիմպավանում: Մարզչական խորհուրդը նաև  անհատական ուշադրություն կդարձնի մարզիկների ընդհանուր պատրաստականության վրա, նպատակով ,որ սաները հնարավորինս լավ հանդես գան Բուլղարիայում փետրվարի 20 –ին մեկնարկելիք Ստրանջայի միջազգային բարձրագույն կարգի մրցաշարում:

Մինչ Տոկիոյի մարզահանդեսը հավաքականը պետք է քննություն հանձնի օլիմպիական վարկանիշային մրցաշարերում: Նախ պետք է ավարտին հասցնել անցյալ տարվա մարտի 16 -ին Լոնդոնում կորոնավիրուսի պատճառով  ընդհատված վարկանիշայինը: Մեր տղաներից Կորյուն Սողոմոնյանին / 52 կգ / հենց այդ օրը հաջողվեց նվաճել  օլիմպիական ուղեգիր: Մյուսները մրցակարգով պետք է շարունակեն պայքարը ընդհատված փուլերից: Առայժմ վիճակն այսպիսին է:

Այլ նորություններ