Ռուսաստանցի Ումար Կրեմլյովը ձայների 57,3 տոկոսով ընտրվել է բռնցքամարտի միջազգային ասոցիացիայի / AIBA / նախագահ։

Քվեարկությունը տեղի է ունեցել կազմակերպության առցանց համագումարում։

Կրեմլյովը 38 տարեկան է: Նա 2017 թվականից Ռուսաստանի բռնցքամարտի ֆեդերացիայի գլխավոր քարտուղարն է  և մարզաձևի Եվրոպայի կոնֆեդերացիայի / EUBC /  առաջին փոխնախագահը:

Ընտրվելուց  հետո նորընտիր նախագահը  շնորհակալություն է  հայտնել վստահության համար և ասել , որ բռնցքամարտի համայնքի հետ միասին կկարողանան իրականացնել բարեփոխումներ ու  հնարավորինս սեղմ ժամկետում վերադարձնել  կազմակերպության  նախկին հեղինակությունն ու վստահությունը։

Որպես առաջնահերթություն  առաջիկա ամիսների ընթացքում կմարվեն  AIBA- ի պարտքերը։ Նախատեսվում է  երկու տարվա ընթացքում  բյուջեն ավելացնել 50 միլիոն դոլարով՝   AIBA- ի վերականգնման ու զարգացման համար,  ինչպես նաև  որոշ քանակի Ֆինանս տրամադրել  ազգային ֆեդերացիաներին։ Աշխարհամասերում կստեղծվեն  բռնցքամարտի ակադեմիաներ ` մարզիկներ, մարզիչներ և մրցավարներ պատրաստելու համար:

Կրեմլյովը վստահ է, որ  հնարավոր է ուղի հարթել  ՄՕԿ –ում  AIBA- ի կարգավիճակը  վերականգնելու  և Փարիզում  2024 թ. կայանալիք օլիմպիական խաղերի համար: