Հռոմում տեղի է ունեցել  Եվրոպայի օլիմպիական կոմիտեի  / ԵՕԿ / 49-րդ համաժողովը: Առկա նիստին ներկա են  եղել միայն ԵՕԿ-ի ղեկավարները, իսկ եվրոպական երկրների 50  ԱՕԿ – ների ներկայացուցիչները՝  հեռավար ձևաչափով: ՀԱՕԿ նախագահ Գագիկ Ծառուկյանի հանձնարարությամբ մեր ազգային օլիմպիական կոմիտեից մասնակցել է   կազմակերպության ղեկավարի  գլխավոր խորհրդական Արմեն Գրիգորյանը։ Նա համաժողովի մասին հետևյալն ասաց․ << Ասամբլեայի մասնակիցները նախ  հարգեցին  կյանքին հրաժեշտ տված ԵՕԿ  նախկին նախագահ Յանեզ Կոչյանչիչի  հիշատակը։

Բացման խոսքով հանդես եկավ  ՄՕԿ-ի նախագահ Թոմաս Բախը։ Նա  նշեց, որ համավարակի պատճառով օլիմպիական շարժումը բախվել է լուրջ մարտահրավերների։ Բայց, ինչպես ասում են, չկա չարիք՝ առանց բարիքի։ Դա օգնել է  ավելի ամրապնդել սպորտի դիրքերը  և բնագավառը դարձնել   հասարակության անբաժանելի մասը: ՄՕԿ –ը համագործակցության համաձայնագիր է  ստորագրել առողջապահության համաշխարհային կազմակերպության  / ԱՀԿ /  հետ և  ընդլայնել համատեղ աշխատանքի ոլորտները։  Թոմաս Բախը   նաև ընդգծեց , որ պետք է մեծ ջանքեր գործադրել  ճգնաժամը հաղթահարելու, աշխարհի բնակչության ֆիզիկական և մտավոր ունակությունները բարելավելու գործում: ՄՕԿ-ի նախաձեռնություններին աջակցում են  ՄԱԿ-ը, Եվրամիությունը  ու  G - 20 երկրների ղեկավարները:

EOC- ի նախագահի պաշտոնակատար Նիլս Նյուգորը խոսեց Կրակովում 2023թ․ անցկացվելիք  եվրոպական մարզական  երրորդ խաղերի  նախապատրաստական աշխատանքների մասին։

Գլխավոր քարտուղար Ռաֆայել Պանյոցին ներկայացրեց կազմակերպության ֆինանսական հաշվետվությունը և  հայտնեց , որ Հունաստանում 2021-ի հոկտեմբերին նշանակված 50-րդ համաժողովը  տեղի կունենա ավելի վաղ ՝ հաջորդ տարվա ապրիլի 16-ին: Կանցկացվեն նախագահի և գործկոմի անդամների ընտրություններ: ԵՕԿ  ղեկավարի պաշտոնին հավակնում են  Նիլս Նյուգորը և Հունաստանի ԱՕԿ –ի  ղեկավար Սպիրոս Կապրալոսը: Բացի այդ, << Օլիմպիական օրակարգ  - 2020 >> -ի համաձայն, գենդերային հավասարության հասնելու համար,  առաջարկվեց EOC- ի գործկոմում ավելացնել կանանց թիվը, և  16 անդամներից առնվազն հինգը պետք է լինեն գեղեցիկ սեռի ներկայացուցիչներ։

ԵՕԿ գործկոմի անդամ Ջորջե Վիշացկին ներկայացրեց մինչև 2030թ․ կազմակերպության զարգացման ռազմավարությունը։ Փաստաթղթի վերջնական տարբերակը  լիարժեք կհրապարակվի հաջորդ ասամբլեայում ՝ շահագրգիռ կողմերի հետ խորհրդակցելուց հետո: 

Ազգային օլիմպիական կոմիտեների ասոցիացիայի գլխավոր քարտուղար Գունիլա Լինդբերգը և ՄՕԿ-ի << Օլիմպիական համերաշխություն >> ծրագրի ու  ԱՕԿ-ների հետ համագործակցության գծով տնօրեն Ջեյմս Մաքլեդը  հայտարարեցին  աջակցման միջոցառումների մասին: 

Եվրոպական երրորդ  խաղերի համակարգող հանձնաժողովի նախագահ Հասան Արատը  հրապարակեց   մարզաձևերի նախնական  ցանկը։ Ցուցադրվեցին Լեհաստանում կայանալիք  խաղերի  մրցասպարեզները։

Չեխիայի Բրնո և Վրաստանի Բորժոմի  ու Բակուրիանի  քաղաքները հաստատվեցին  են համապատասխանաբար  2025թ․  ամառային և ձմեռային եվրոպական երիտասարդական օլիմպիական փառատոների  / EYOF/ մայրաքաղաքներ։

Միջոցառումն ավարտվեց  Պետր Նուրովսկու   մրցանակի հանձնման արարողությամբ: Պատվավոր ավարը և դրամաշնորհը  ստացավ իտալացի բիաթլոնիստուհի Լինդա Ցինգերլենը ․ ․ ․  >>։