Այսօր ՝ սեպտեմբերի 17 –ին, Երևան-Մինսկ- Ստամբուլ – Բուխարեստ - Կլուժ – Նապոկա  չվերթներով Ռումինիա մեկնեց ՀՀ աթլետիկայի հավաքականը։ Մեր 12  մարզիկ – մարզուհիներին մրցավայր են ուղեկցել երեք մարզիչներ։ Նրանք հանգստյան օրերին կմասնակցեն Բալկանյան երկրների առաջնությանը։

Մեր երկրի ներկայացուցիչները հանդես կգան 100, 200, 400, 800, 1500, 3000 մետր վազքատարածություններում, հեռացատկ, եռացատկ, սկավառակի և մուրճի նետում մրցաձևերում։

Պատվիրակության  ղեկավարն է ՀՀ աթլետիկայի ֆեդերացիայի նախագահ,  անվանի հեռացատկորդ, Եվրոպայի անգերազանցելի ռեկորդակիր Ռոբերտ Էմմիյանը։

Ի դեպ, Հայաստանի մարզական դրոշի պատիվը կպաշտպանի նաև ամերիկահայ արագավազորդ Ալեքս Դոնիկյանը, որը  Զագրեբի միջազգայինում մրցելուց հետո է միանալու ՀՀ հավաքականին։ Նա 100մ․  վազքատարածությունում 10, 55 վրկ․արդյունքով  գրավել է  յոթերորդ տեղը։