ՀԱՕԿ նախագահ Գագիկ Ծառուկյանն ընդունել է Զամել Սայաֆ Ալ Շահրանիին

14:29 - 12 Դեկ, 2019

ՀԱՕԿ նախագահ Գագիկ Ծառուկյանն ընդունել է Հայաստանում գտնվող Արաբական երկրների ըմբշամարտի ֆեդերացիայի նախագահ, UWW-ի գործկոմի անդամ Զամել Սայաֆ Ալ Շահրանին:

Կատարից ժամանած հյուրն իր խոսքում նշել է, որ հիացած է մարզական այն հնարավորություններով, որն ունի Հայաստանը։

«Հարգելի պարոն Ծառուկյան, շնորհակալ եմ ջերմ ընդունելության համար։ Ես եղել եմ աշխարհի շատ երկրներում, բայց այսպիսի ենթակառուցվածքներ քիչ կան, նկատելի է Ձեր կատարած աշխատանքը այս ոլորտում և հայկական մարզաշխարհի հարգանքը Ձեր նկատմամբ։ Ցանկանում եմ, որ մեր համագործակցությունը կյանքի կոչվի և շարունակական լինի»,- նշել Ալ Շահրանին:

ՀԱՕԿ նախագահ Գագիկ Ծառուկյանը նշել է, որ Հայաստան ժամանած մարզիկները կարժանանան համապատասխան ուշադրության։

«Բարի գալուստ Հայաստան, մենք շատ ուրախ և շնորհակալ կլինենք համագործակցության ու կապերի հաստատման համար: Սա քայլ է մեր հարաբերությունները վերածել գործնականի և ամրապնդել այն: Ես սպորտի մարդ եմ և գիտեմ, թե ինչ է անհրաժեշտ, ուստի Հայաստան ժամանած մարզիկներն ու մարզիչները կստանան համապատասխան ուշադրություն, որպեսզի համագործակցությունը շարունակվի, իսկ սպորտն էլ զարգանա: Մենք ստեղծել ենք այդ պայմանները, որպեսզի կարողանանք արդյունք պահանջել մեր մարզիկներից: Առանց դրա դու չես կարող արդյունք պահանջել: Մենք դեռ շատ անելիքներ ունենք մարզաշխարհում։ Բոլոր բնակավայրերում պետք է ունենանք մարզադպրոցներ, որպեսզի երեխաները մարզվեն, իսկ մենք կարողանանք ընտրել լավագույններին»,- ասել է Գագիկ Ծառուկյանը:

Հանդիպման վերջում ՀԱՕԿ նախագահը խորհրդանշական հուշանվեր է հանձնել Զամել Սայաֆ Ալ Շահրանիին:

Այլ նորություններ