Մոսկվայում ավարտվեց  սպորտային մարմնամարզությունից  օլիմպիական խաղերի կրկնակի չեմպիոն Միխայիլ Վորոնինի հիշատակը հավերժացնող գավաթի խաղարկության հոբելյանական ` 25 –րդ մրցաշարը / տարիքային երկու խմբով / : Մասնակցեցին 26 երկրների 140 պատվիրակներ:

Մեծահասակների  բազմամարտում գերազանց մրցելույթներ ունեցավ Հայաստանի ներկայացուցիչ, շնորհալի  Արթուր Դավթյանը: Նա վստահորեն գրավեց առաջին տեղը ` իրենից ետ թողնելով  մրցանակային  եռյակում հաջորդաբար տեղ գտած Ճապոնիայի և Ռուսաստանի  մարզիկներին: Արթուրը կայունությամբ աչքի ընկավ նաև առանձին գործիքների վրա մրցումներում: Երևանցին  առաջինն էր նժույգթափերում , երկրորդը` օղակների և երրորդը ` ազատ վարժություններում:

Երիտասարդների պայքարին մասնակցեց մեր  պատվիրակ Գագիկ Խաչիկյանը ,ով բազմամարտում եզրափակեց առաջին ությակը, իսկ նժույգթափերում գրավեց առաջին տեղը և կանգնեց պատվանդանի ամենավերին աստիճանին:

Մարմնամարզուհիների մրցումների  հենացատկ մրցաձևում տոն տվեց մեր միակ մասնակից Աննա Գրիգորյանը: Նա երրորդ արդյունքով մտավ եզրափակիչ և ուժեղագույն ությակի մրցավեճում գրավեց պատվավոր չորրորդ տեղը: Աննան 12 –րդն էր բազմամարտում:

Թիմային պայքարում Հայաստանի հավաքականը ճանաչվեց հինգերորդը:

ՀԱՕԿ լրատվական բաժին