Պատանի նետաձիգները պայքարելու են պատանեկան օլիմպիական խաղերի վարկանիշի համար
ԲԿՄԱ-ում կայացած նետաձգության Հայաստանի առաջնությունում, որն անցկացվեց բացօթյա, 70+70 մետր մրցաձեւում տղաներից հաղթող դարձավ Սամվել Խաչատրյանը, աղջիկներից՝ Հայկուհի Մարգարյանը: Նետաձգության Հայաստանի հավաքականի գլխավոր մարզիչ Բորիս Վասիլյանը ՀԱՕԿ լրատվականին ասաց, որ հիմա իրենք պատրաստվում են մրցաշրջան 2017-ի պատասխանատու մեկնարկներին:
Արդեն այս ամսվա 16-ին Սամվել Խաչատրյանը, Լեւոն Պողոսյանը եւ Արման Բալդրյանը Հունաստանի Մարաթոն քաղաքում մասնակցելու են Եվրոպայի երիտասարդների եւ պատանիների գավաթի 1-ին փուլին: Սամվելը հանդես է գալու երիտասարդների մեջ, Լեւոնն ու Արմանը՝ պատանիների.
«Այս երկու պատանիները նախապատրաստվում են հոկտեմբերին Արգենտինայում կայանալիք աշխարհի պատանիների առաջնությանը, որը նաեւ 2018 թվականի պատանեկան օլիմպիական խաղերի վարկանիշային մրցաշար է: Երեք նետաձիգներն էլ Հունաստանից կմեկնեն Լեհաստան՝ մասնակցելու Եվրոպայի մեծահասակների գավաթի 1-ին փուլին: Այնուհետեւ, մայիսին կկայանա Հայաստանի ֆեդերացիայի գավաթը, որից հետո կորոշվի, թե ովքեր կմեկնեն հունիսին Անթալիայում կայանալիք մեծահասակների աշխարհի գավաթի խաղարկություն», - ասաց Բորիս Վասիլյանը:
