Նորություններ

Լոնդոնի օլիմպիական խաղերի մեկնարկին մնացել է 186 օր: Այդ գլխավոր մարզահանդեսին կմասնակցի նաև Հայաստանի պատվիրակությունը: Առայժմ մեր երկրի 11 ներկայացուցիչ է նվաճել օլիմպիական ուղեգիր: Այս թիվն անշուշտ կմեծանա: Նկատի ունենք օլիմպիական վարկանիշային մրցաշարերը,որոնք մարզական խիտ ժամանակացույցով  իրար կհաջորդեն մինչև մայիսի վերջը:

Հայաստանի մարզիկները հանդես կգան եվրոպական երկրների ներկայացուցիչների համար նախատեսված մրցումներում: Երեքական ստուգատեսում իրենց ունակությունները կդրսևորեն  ազատ և հունահռոմեական ոճի ըմբիշները: Լոնդոն մեկնելու նպատակով վարկանիշային ստուգատեսների կմեկնեն մեր բռնցքամարտիկները, նետաձիգները, ձյուդոիստները, աթլետները, լողորդները, նժույգավարները և առագաստանավորդները: Իսկ թաեքվոնդոյի առաջատար մեր երկու վարպետները` երևանցիներ Հայկազ Սամվելյանը /58կգ / և Արման Երեմյանը /80կգ / արդեն Կազան քաղաքում են,որտեղ օլիմպիական ուղեգրերի համար ,, մարաթոնը ,, կսկսվի վաղը` հունվարի 24-ին: Նույն օրն  ի դեպ Երևանի խուլ-համրերի մարզապալատում կհնչի  նաև Հայաստանի բռնցքամարտի առաջնության սկիզբն ազդարարող գոնգի ձայնը: Ռինգ կելնեն երկրի առաջատար բոլոր վարպետները:

                                                                                                                           ՀԱՕԿ-ի լրատվության բաժին